জালুকবাৰীত যাত্ৰীক প্ৰতাৰণা: মাজপথত বাছ কণ্ডাক্টৰৰ গুণ্ডাগিৰি, আক্ৰমণৰ চেষ্টা
গুৱাহাটী/বৰপেটা ৰোড: গুৱাহাটীৰ জালুকবাৰীৰ পৰা কলগাছিয়ালৈ যোৱাৰ নামত এজন যাত্ৰীক ভয়ংকৰ হাৰাশাস্তি আৰু প্ৰতাৰণা কৰাৰ এক চাঞ্চল্যকৰ ঘটনা পোহৰলৈ আহিছে। বাছ চালক আৰু কণ্ডাক্টৰৰ মইমতালিৰ বলি হৈ এতিয়া নিৰাপত্তাহীনতাত ভুগিছে এগৰাকী সাধাৰণ যাত্ৰী।
ঘটনাৰ বিৱৰণি:প্ৰাপ্ত তথ্য অনুসৰি, ভুক্তভোগী যাত্ৰীজনে জালুকবাৰীৰ পৰা কলগাছিয়ালৈ যাবৰ বাবে এখন বাছত উঠিছিল। বাছখনত উঠাৰ পূৰ্বে চালকক তেওঁ কলগাছিয়ালৈ যাব নেকি বুলি সোধাত চালকজনে যাব বুলি স্পষ্টকৈ জানিবলৈ দিছিল। কিন্তু যাত্ৰা আৰম্ভ কৰাৰ কিছু সময় পিছতেই বাছখনৰ কণ্ডাক্টৰজনে সুৰ সলাই বাছখন কলগাছিয়াৰ পৰিৱৰ্তে বৰপেটা ৰোডলৈহে যাব বুলি ঘোষণা কৰে।
কেৱল সিমানেই নহয়, যাত্ৰীজনক আধাবাটতে নমাই দিয়াৰ ভাবুকি দি কণ্ডাক্টৰজনে বৰপেটা ৰোডলৈ যোৱাৰ বাবে জোৰ-জবৰদস্তি ধন দাবী কৰে।
কণ্ডাক্টৰৰ আক্ৰমণাত্মক আচৰণ:
যাত্ৰীজনে ইয়াৰ প্ৰতিবাদ কৰি জানিবলৈ দিয়ে যে তেওঁ বৰপেটা ৰোডলৈ নাযায়, তেওঁৰ লক্ষ্যস্থান কলগাছিয়াহে। মিছা কথা কৈ যাত্ৰীক কিয় অনা হ’ল বুলি প্ৰশ্ন কৰাত আৰু চালকৰ সৈতে কথা পাতিহে ধন দিয়াৰ কথা কোৱাত কণ্ডাক্টৰজন হিতাহিত জ্ঞান হেৰুৱাই উগ্ৰ হৈ পৰে। জানিব পৰা মতে, অভিযুক্ত কণ্ডাক্টৰজনে যাত্ৰীজনক শাৰীৰিকভাৱে আক্ৰমণ কৰিবলৈও চেষ্টা চলায়।
যাত্ৰীৰ নিৰাপত্তাক লৈ প্ৰশ্ন:
দিন-দুপৰতে ৰাজপথত যাত্ৰীৰ সৈতে হোৱা এনে দুৰ্ব্যৱহাৰে এতিয়া তীব্ৰ প্ৰতিক্ৰিয়াৰ সৃষ্টি কৰিছে। একাংশ বাছ চালক আৰু কৰ্মীৰ এনে দৌৰাত্ম্যই সাধাৰণ যাত্ৰীসকলৰ যাতায়তৰ নিৰাপত্তাক লৈ ডাঙৰ প্ৰশ্নচিহ্ন থিয় কৰিছে। ভুক্তভোগী যাত্ৰীজনে এই সন্দৰ্ভত উচিত বিচাৰ আৰু যাত্ৰীৰ সুৰক্ষা নিশ্চিত কৰিবলৈ কৰ্তৃপক্ষক আহ্বান জনাইছে।
মন্তব্যসমূহ
একটি মন্তব্য পোস্ট করুন